Улаанбаатар хотноо зохион байгуулагдсан “Италийн судалгааны өдөр дэлхий даяар” 9 дэх удаагийн арга хэмжээ
Улаанбаатар хот дахь Итали Улсын Элчин сайдын яам нь Монгол Улсын Их Сургуультай хамтран шинжлэх ухаан, инноваци, олон улсын хамтын ажиллагааны талаар хэлэлцүүлэг зохион байгуулж, Эрсилиа Ваудо (Европын Сансрын Агентлаг)-ын “Сансар: төгсгөлгүй адал явдал” сэдэвт онлайн лекцийг хүргэлээ.
Арга хэмжээнд мөн Итали–Монголын парламент хоорондын найрамдлын бүлгийн дарга, цөмийн физикч А.Ундраа оролцож, Триест хот дахь Онолын физикийн Олон улсын Абдус Салам төвд суралцсан туршлагаа хуваалцав.
Энэхүү арга хэмжээнд Монгол Улсын Их Сургуулийн олон оюутан, багш, судлаачид оролцсон бөгөөд Пакистаны нэрт эрдэмтэн Абдус Саламын мэндэлсний 100 жилийн ойг мөн дурсан тэмдэглэв.
Энэхүү санаачилга нь Италийн шинжлэх ухааны дипломат бодлого болон авьяас чадварыг дэмжих үйл ажиллагааны хүрээнд хэрэгжиж, Монгол Улстай энэ салбар дахь хамтын ажиллагааг бэхжүүлж байна. Ялангуяа сансрын салбар нь хоёр орны академик, шинжлэх ухааны хамтын ажиллагаанд ирээдүйтэй чиглэл юм. Монголын сансрын нисгэгч Ж.Гүррагчаа нь Азийн хоёр дахь сансрын нисгэгч байсан бөгөөд Монгол Улс сансар судлалтай холбоотой олон чиглэлээр судалгааны хөтөлбөрүүд хэрэгжүүлж байна.
Монгол Улсын Их Сургуулийн дэд захирал профессор Баатарчулуун лекцийг нээж, Итали Улсын Элчин сайд Жованна Пиккаррэтатай хамтран Галилео Галилейгоос эхлээд өнөө үе хүртэлх Италийн шинжлэх ухаанд оруулсан хувь нэмрийг онцлон тэмдэглэв. Түүнчлэн Жоржо Паризи, Рита Лэви-Монталчини зэрэг нэрт эрдэмтдийг дурдлаа. Сүүлийнх нь Нобелийн шагналт эрдэмтэн бөгөөд түүний төрсөн өдөр болох 4 дүгээр сарын 22-нд энэхүү өдрийг тэмдэглэдэг.
Элчин сайд мөн Invest Your Talent in Italy хөтөлбөрийг танилцуулж, 2026 оноос эхлэн Монгол Улсад хэрэгжиж эхэлснийг онцлов. Энэ нь залуу авьяастнуудыг дэмжих Италийн бодлогын илрэл юм. Хөтөлбөрт хамрагдах өргөдлийн хугацаа 5 дугаар сарын 11-ний 18:00 цаг (Италийн цагаар) хүртэл үргэлжилнэ. Дэлгэрэнгүй мэдээллийг дараах холбоосоор авна уу: https://investyourtalentapplication.esteri.it/SitoIYT/EN/invest-your-talent-in-italy
